O loo faaauau pea uiga louloua o le tau e le gata ile setete o Niu Sau Uelese ae faapea foi I Kuiniselani. O le itu I saute I sasae o Kuiniselani ua faailoa mai I lipoti aupito lata mai o loo aafia nei ile aso lona lua lenei o timuga mamafa.

O le amataga mai o le vaiaso na aafia ai Niu Sau Uelese I timuga, to faataitai ma timu aisa I le tele o vaega sa faapea ona lolovaia ai le tele o magaala I Sini faapea isi vaega o Niu Sau Uelese.

Ua iai si tina e 63 tausaga ua faamaonia ua maliu I tafega ile aso ananafi na maua atu ai lana taavale o magoto I Gympie ma o loo iai lava I totonu. Pe oo atu I le 300 mm ole suavai timu na pau ile faaitu lea ma o nisi na faasaoina mai ia lologa sa faamatala I le televise ile aso pe a ma le tolu I le faitula o nofonofo I luga o laau na fepeei iai mo le saogalemu ina ua le mafai ona faaauau a latou taavale I luga o le alatele ona o le maualuga o le suavai mai tafega.

Fautuaina e le SES, leoleo ma isi matagaluega o loo feagai ma galuega laveai ma fesoasoani I aso faapenei, ia usitaia e le atunuu fautuaga ma nonofo I fale ma alofia vaega o loo iai lologa aua e sili lava le puipuia nai lo le tau togafitia.