Ua faamatala e le aiga o si talavou e 17 tausaga lea ua maliu, le ituaiga tagata e iai sia talavou aemaise o lana mafutaga ma lona aiga ma nai ona tuafāfine. O le talavou mai Canberra o Lachlan Andrews na uma lona ola ina ua faaoolima iai le tagata i se vevesi na tulai mai i le faaitu o Casino i Niu Sa Uelese lava.  

Sa faigaluega leipa i nisi o fale sa faaleagaina i le itu i Matu o Niu Sa Uelese ma Kuiniselani ae tupu ai le faalavelave ua uma ai lona soifua. Fai mai leoleo o le vevesi na tupu i fafo ane o se fale’aiga i le faaitu lea i le po o le Aso Sa na te’a nei na lavevea ai ni talavou se to’alua mai manu’aga.  

O le isi e 18 tausaga na aveina atu i le falemai ma ua faasolo manuia peitai o Lachlan na uma ai lava lona ola i le nofoaga na tupu ai le faalavelave.

Ua maua la e leoleo ma molia le isi foi talavou 17 tausaga i le faalavelave lenei ma e lē o mafai ona tatalaina i tua ae ua molia i le fasioti tagata.