O se aso faanoanoa mo le Green Party, faapea le Labour Party ua leva ona auai foi lenei tamalii, le loaloa o tagata Pasefika uma aemaise Samoa i Niu Sila nei, ina ua pa mai le tala, ua maliu faafuasei le Afioga i le alii faipule ia Faanānā Efeso Collins.
Sa auai le alii faipule i se tasi o faamoemoe ua ta’ua o le ChildFund Water Run e fesoasoani mo tagata Pasefika i le itula e 9 i le taeao nei i Britomart i Aukilani.
Sa auai Faanānā ma nisi o tagata taualoa o Aukilani e pei o Dave Letele, Matty McLean, ma le tamaitai faasalalau ia Hilary Barry.
Na māua i faamatalaga na faafuasei ona pa’ū Faanānā ma e masalomia o se ma’i oso i le mae’a o le faamoemoe i le taeao nei.
Sa vaaia le maligi o loimata o sui faapea uo ma ē masani na auai i le ChildFund Water Run ina ua maliu lenei tamalii.
Na filifilia le Afioga ia Faanānā Efeso Collins e avea ma sui o Komiti Faafoe o le Puleganuu a Otara – Papatoetoe i le tausaga 2013 ma avea ai ma Taitaifono o le Komiti.
I le tolu tausaga mulimuli ane na filifilia ai o ia e avea ma se tasi o Faufautua e toalua mo le Pulega o Aukilani mo le faaitu a Manukau.
O le tausaga 2022 na tauva ai le afioga ia Faanānā o se sui tutoatasi mo le tofiga o le Pulenuu (Mayor) o Aukilani i le lagolagosua a le Labour Party, e ui e lei manuia lana taumafai ae na lona lua atu o ia i le sui na manumalo, Wayne Brown.
O le tausaga 2023 na filifilia ai Faanānā Efeso Collins o se sui faipule i totonu o le Palemene o Niu Sila i lalo o le fu’a a le Green Party i le mae’a ai o le faigapalota.
Ua tuumalo nei le afioga i le alii Faipule ae o loo soifua mai lona faletua ma o la alo e toalua.
