O le vaveao o le Aso Lulu i le maota gasegase i Leulumoega tuai na faanatinati atu iai se alii pagota mo ni togafitiga e pei ona masalomia na pule i lona ola, ae na iu ina maliu.
Ua faailoa e le Komesina o leoleo, susuga Auapaau Logoitino Filipo, o le pagota ua maliu sa tuli lona faasalaga soloatoa i le solitulafono o le fasioti tagata faamoemoeina.
Na musu le Komesina e faailoa le suafa o lē ua maliu ona e ao ona logoina muamua lona aiga.
Peitai ua faailoa e se molimau faatuatuaina o se leoleo sinia o le pagota ua fano le soifua o Kolani Junior Lam, sa nofosala i le toese ona o le maliu o lona toalua o Sa’u Justina Sa’u Lam.
O loo faia suesuega a leoleo pe na faapefea ona oo le vailaau fagavao i totonu o le falepuipui i Tanumalala e pei ona masalomia na inu e lē ua maliu.
O le taimi o loo galulue pagota i faatoaga a le falepuipui na tupu ai le faalavelave e pei ona faailoa e le Komesina o leoleo.
