Ua maliu i lalo o le vaaiga a leoleo se alii sa molia i le faaoolima i ni tagata se toalua i se dairy i West Auckland i le amataga o le masina lenei e pei ona lipotia e le One News.
O le osofaia o si ulugalii e ana le dairy lea i New Windsor i le aso 5 o Oketopa na ave ai i laua i le falemai ma sa i se tulaga tigaina si tamaloa.
O Mitchell Lam 24 tausaga e lipotia na pueina ai e leoleo ma molia i le faaoolima faamoemoeina ma sa fuafua e tulai i le faamasinoga i le aso ananafi.
Peitai la ua faamatala e lana loia i le faamasinoga o lana client ua maliu a o iai i le vaaiga a leoleo ma sa ta’ua ai lona talanoa atu i le Crown Law mo le faaui i tua o moliaga.
I le amataga o le masina nei pei ona ta’ua e leoleo sa iai nisi tagata i le faleoloa lea i le taimi na faia ai le osofaiga a lē ua molia ma o i latou ia sa taofia mai lea tagata seia oo ina taunuu atu leoleo.
O le masina fou la ua lipotia o le a faafofogaina ai i le faamasinoga le talosaga mo le ave i tua o moliaga ae o loo tālia se lipoti i le mafuaaga ua maliu ai le alii o Mitchell Lam.
