O se tala fiafia mo atunuu o loo i totonu o le fono a Malo o le Pasefika e aofia ai ma Samoa, le toe foi ane o le tevaaga a le Malo o Kiripati, ma ua toe faamaopoopo e avea ma sui o le taupulega a Malo o le Pasefika le Pacific Islands Forum.
O le uluai aso o le masina fou lenei o Fepuari le Aso Lulu o le vaiaso nei, na faailoa ai e le Failautusi aoao o le Forum, le tafa o le finagalo o le Peresetene o Kiripati e toe avea ma sui o Malo o le Pasefika i le tuanai o ni masina e le o toe auai.
Na mafua lea tulaga ona o le lē fiafia o le Malo Kiripati ma nisi o atunuu Maikoronesia i le filifiliga o le failautusi o le ofisa o Malo o le Pasefika na manumalo ai lē sa avea ma Palemia o le Atu Kuki o Henry Puna. Na toe foi ane nisi o atunuu na alu i le tevaaga, ae faauliulito pea Kiripati.
O le vaiaso na tea nei na afea ai lea Malo i le asiasiga taualoa muamua a le Palemia fou o le Malo Fiti o loo tauaveina le tulaga taitaifono o le Forum, o Sitiveni Rabuka ma o le tasi lea o autu o lana asiasiga o le faatalatalanoa o le Peresetene o Kiripati, ina ia toe foi atu i le Fono a Malo o le Pasefika.
O lea ua tulai mai ua maua le ‘ai o le asiasiga a Rabuka ua toe faatasia uma taitai o Malo o lenei faaitulagi ma ua toe maua le galulue faatasi e pei ona sa iai muamua.
