O soo se nuu ma se afioaga o le atunuu e naunau pulega a matai e faatino galuega lelei mo le manuia o o latou tagata.
E faapena le faamoemoe ua taunuu o motu o Manono ma Apolima tai, ua tali lo latou manao i ni moli e ola i vaega eseese o motu aemaise i vaega o loo faamautu ai aiga.
Ua mumū feilafi i le po moli e maua i le malosi o le lā poo solar lights mo ia motu, e faafetaia ai le fesoasoani tuusa’o a le ofisa o le Malo o Ausetalia i Samoa, ua mafai ona faatupe ai le faatutuina o ia moli e 45 mo le motu o Manono, ae 5 i le motu o Apolima.
O le 45 o moli i le motu o Manono ua aofia ai ma moli i uafu o loo faaee ma tuta iai ‘alia fagota o loo femalagaa’i ai tagata o le motu aemaise o le atunuu e malaga iai mo nisi o fuafuaga ma faalavelave fai masani.
O le tamaitai Komesina maualuga o Ausetalia i Samoa ma le sui faipule o Aiga i le Tai sa malaga e faalauiloa le mae’a o le galuega e le gata o le motu o Apolima ae faapea foi i Manono.
