E 44 le aofaiga o le aumalaga a le Kolisi o Samoa o loo iai i totonu o Aotearoa nei i le latou malaga taamilo a le aulakapi. 

O fanau taaalo e 30 faatasi ai ma le pulega ma faiaoga. 

O le faamoemoe maualuga o lenei malaga o le finagalo o le susuga i le tamaitai puleaoga ia Karene Faasisila ma le ofisa o faiaoga ina sau se malaga a le aulakapi First XV a le kolisi i Niu Sila e faalautele ma siitia ai le malamalama o fanau i le faatinoina o le taaloga o le lakapi. 

Na faailoa e le susuga i le faiaoga o le aulakapi ia Tui Komiti, o le lakapi e lē o se mea faigofie, ae o le avanoa o le mea tāua lea mo fanau e auai ai ina ia faalautele le malamalama.  

Ua mae’a taaloga e 4 talu ona tamilo le aulakapi i totonu o Niu Sila. 

O le taaloga muamua na taaalo ai ma le aoga a New Plymouth High School ma manumalo ai le New Plymouth High School i le 24 i le 8 a le Kolisi o Samoa. 

O le taaloga lona lua na malolo ai i le aoga a Waitara Whanui i le 19 i le 12 a le Kolisi o Samoa. 

O taaloga e lua i luga i Aukilani na manumalo ai le Kolisi o Samoa i le 24 ‘ai i le 17 a le Kolisi o Long Bay, ma lana taaloga mulimuli ma le Kolisi a Otahuhu na faia’ina ai i ‘ai e 8 i le 32 a le Kolisi o Otahuhu. 

O le faatāuaina o le avanoa mo fanau na saunoa ai le susuga ia Tui Komiti o le tapenaga o le malamalama o fanau i le faatinoina o le taaloga e lē tapenaina i se tausaga se tasi. 

E tatau ona tele se taimi e faaalu e a’oa’oina lelei ma fai aoga mo fanau i le faatinoina o le taaloga. 

Na vaaia foi le malosi o le lagolago a mātua ma aiga o loo aumau i Niu Sila nei i nofoaga o loo faia ai taaloga a le Kolisi aemaise lava i aoga o loo iai alo ma fanau o loo auai mai i le malaga. 

O loo tatala i tua fanau e asiasi i o latou aiga e tapena ai le aso e toe taliu ai i Samoa.