O le ogatotonu o lenei vaiaso ua tuua ai le atunuu e le afioga i le Palemia ma lana aumalaga o nisi o Minisita o le Kapeneta ma faauluuuga o Matagaluega a le Malo ua filifilia, i le faamoemoe e auai i le talanoaga ma ta’ita’i o le faigamalo a Amerika Samoa i le Kovana sili ma lana taupulega.
O le tausaga e 2017 o le taimi mulimuli lea na faia ai ia feiloa’iga ma talanoaga, ae o le faato’ā toe faaauau lea i le tuanai o le 4 tausaga aemaise o le 3 tausaga o tapunia tuaoi faavaomalo o atunuu ona o puipuiga o le faamai Koviti-19. O le uluai taimi lea ua auai le tamaitai Palemia ma sui o le Malo o Samoa talu ona see atu le vaega faaupufai o le Faatuatua i le Atua Samoa ua Tasi e tauave le puleaina o le Malo Tuto’atasi, ma o le taimi muamua foi o le Kovana sili o Amerika Samoa ma lana faigamalo ua feiloai ai mo le faia o ia talanoaga.
O mataupu i femalagaa’iga, fefaataua’iga, le atina’e o faato’aga aemaise o puipuiga o atunuu mai le faama’i,e o nisi ia o mataupu ua faailoa e le Palemia le afioga Fiame Naomi Mataafa o le a agai iai talanoaga.
O le Aso Tofi i Samoa ae o le Aso Lulu lea i Amerika Samoa o le a faagasolo ai ia feiloa’iga ma talanoaga. O le masina o Aperila sa fuafua e faia ai lea faamoemoe peitai ona o le pesia o Samoa e lua i le faama’i na tolopo ai i se taimi e pei ona faatino i le masina nei o Iulai. O le faai’uga o le vaiaso nei e toe taliu mai ai i fanua le ta’ita’i o le Malo ma lana aumalaga.
