E toalima sui faipule o le Palemene a Samoa e aofia ai le afioga i le Fofoga Fetalai ia Papalii Li’o Oloipola Ta’eu Masipa’u, o le sui faipule o le itumalo o Vaimauga 2 le afioga le faipule ia Lenatai Victor Tamapua, sui faipule mai le itumalo o Aleipata Itupa i Lalo le afioga ia Faagasealii Sapoa Feagia’i, sui faipule o le itumalo o Aana Alofi 3 le afioga ia Agaseata Valelio Tanuvasa, faapea le sui faipule o le itumalo o Salega 1 le afioga ia Fepuleai Faimata Su’a, na malaga mai e tali le valaaulia a le Palemene o le malo o Niu Sila.
O le paeaiga a le Labour na latou tauaveina ai le faigamalo a Niu Sila i le taimi ua mavae na malaga ai i Samoa le Fofoga Fetalai ia Adrian Ruvawhe ma le latou aumalaga e asiasi i le Palemene a Samoa, ma o i na maua ai le avanoa e talosaga ai loa le Fofoga Fetalai a Samoa le susuga ia Papalii Li’o Oloipola Ta’eu Masipa’u e fia maua foi se avanoa e sau ai se latou asiasiga i le Palemene a Niu Sila.
(Photo Credit: New Zealand Parliament)
Peitai sa mautu le talanoaga ma le manatu e ono toe tulai mai le Labour i lenei nofoaiga.
Ae ina ua mae’a le palota ua sui le faigamalo a Niu Sila, sa manatu loa le Fofoga Fetalai a Samoa ailoga nei a taunuu lenei feiloaiga.
Ae o le tulai mai o le Fofoga Fetalai o le Palemene a Niu Sila i le taimi nei ia Gerry Brownlee na ave ai loa lana tusi valaaulia i le Fofoga Fetalai a Samoa ma le Palemene e sau se latou malaga ma lona faletua, ma ni latou sui faipule se toafā, ma o lea sa filifilia ai loa e le Fofoga Fetalai sui fapule e toalua a le HRPP ma sui faipule e toalua a le FAST faatasi ai ma le Fofoga Fetalai ma lona faletua faapea le sui failautusi o le fono.
Ae o le saunoaga a le afioga i le Fofoga Fetalai a Samoa ia Papalii Li’o Ta’eu Masipa’u i le faatalatalanoaga i luga o le polokalame a le PMN, na ia ta’ua ai le tāua o le latou malaga na auai mai ai i le Palemene a Niu Sila.
E tele ni mataupu sa faasoa iai ma le Fofoga Fetalai o le maota a Niu Sila, ae o le isi mataupu sa faamamafa iai le talanoaga a faipule a Samoa ma le Fofoga Fetalai, o le vaega lea i le tulafono tau faaofi a soo se faipule e ese mai le faigamalo, auā e lē faigofie lea vaega e pei ona saunoa le Fofoga Fetalai, o loo iai lea mataupu i totonu o le tulafono tumau a Samoa ae lei faatinoina lava lea vaega.
Ma o le laualuga la o lea feiloaga a faipule a Samoa ma le Fofoga Fetalai a Niu Sila i lea mataupu, ua lagona ai e le afioga i le Fofoga Fetalai a Samoa ua tatau ona faatinoina lea tulafono i Samoa.
O le isi vaega na sili ona faafiafiaina ai le malaga a le Palemene a le malo o Samoa ona ua fetaui le auai mai i le latou valaaulia, ma le lauliliuina o le pili o le sitiseni a Samoa i Niu Sila nei e pei ona iai le pasiaina o lona faitauga muamua i totonu o le Maota Fono a Niu Sila.
Ma o se oso lelei lea mo latou ina ua latou faalogologo lelei i totonu o le Maota Fono ina ua talia i latou e faalogologo iai i taumafaiga a nisi o tamalii Samoa o loo i totonu o le Palemene a Niu Sila ma nisi o tamalii o loo taulamua e finauina lea mataupu auā se manuia o Samoa.
