Ua faailoa i nisi o lipoti i le asō le iai o le naunauta’iga o nisi ina ia talosaga loa mo laisene e faatau ai le ‘ava malosi i o latou faleoloa a o lei amata faamamaluina tulafono fou e faatatau i le ‘ava malosi.
O le LAP poo le Local Alcohol Policy lea ua pasia o le a faamamalu i Aukilani i le masina nei ma o le a tuu ai se umi e 2 tausaga e taofia lē tumau ai le faatūina o nisi faleoloa fou e faatau ai le ‘ava malosi.
O le failautusi o le Communities Against Alcohol Harm o le loia o Grant Hewison na ia ta’ua i se faatalanoaga i le RNZ ua o latou vaaia le tele o talosaga fou ua faia nei i totonu o le 3-4 masina talu ai mo laisene o faleoloa e faia lea auaunaga.
Fua i faamaumauga mai le Council, e 139 isi talosaga fou o laisene faatau ‘ava malosi ua oo atu talosaga amata mai ia Me seia oo mai i le faai’uga o le masina talu ai o Aokuso.
Ta’ua e le Councillor mai Aukilani o Josephine Bartley i le faatalanoaga lea talu mai le 2018 e oo atu i le 9,491 talosaga mo laisene faatau ‘ava malosi ae na o le 25 na teena ma o le ala lea e ta’ua ai le finau malosi pea o komiuniti e tetee i le tuuina atu pea o ia ituaiga laisene.
Puna o Faamatalaga: https://www.rnz.co.nz/news/ldr/526802/rush-for-auckland-bottle-shop-licences-ahead-of-new-rules
