O faamaumauga fou mai le National Notifiable Disease Surveillance System le NNDSS ua faailoa ai ua umi atu le taimi ua aafia ai tagata i le flu o le taumālūlū o lenei tausaga pe a faatusa i tausaga ua tuanai.
Mai ia faamaumauga ua iloa ai o le masina o Iuni ma Iulai o le tausaga nei ua faamauina ai e silia ma le 316,000 gasegase respiratory illness i le atunuu atoa ma o se aofa’iga maualuga tele pe a faatusa i le tausaga na te’a nei.
Saunoa ai le sui ta’ita’ifono o le Australian Royal College of GP, Anju Aggarwal o le faaumiumi o le piliota o le fulū ua maitauina ai le eseese o ituaiga o nei faama’i ua fepesia’i solo ma ua faaigoa lea tulaga o le flumonia.
E aofia ai ituaiga eseese o le flu e pei o le influenza, pertussis poo le tale vivini, RSV ma le Koviti-19.
Fai mai e amata i se faama’i se tasi ona aafia ai lea o le immune system i le isi vairusi ma faasolo atu ai foi i le isi ma e ono maitauina o nisi taimi e faapea ua mae’a le flu peitai e maitauina e toe aafia foi ma e foliga e ogaoga atu.
Faailoa e Aggarwal o se foma’i ua ia maitauina gasegase e amata i se gasegase e feololo aafiaga ae faai’u ane ua faasolo ina tigaina ma aafia ai i le pneumonia aemaise lava i tamaiti 5-15 tausaga le matutua ma e mātele ina faaumiumi le tale e ui e vaaia o loo fiafia lava ma foliga e lē o iai se aafiaga tele.
Ua fautua mai le foma’i i gasegase ua faaumiumi ai āuga o le tafe o le isu tulou faapea ma le tale, e fesoasoani le vaitamini C i le immune system ma taumafa tele i le vai, faamamā lima ma faaaogā pea talifofoga pe a aga’i i nofoaga faitele.
Puna o Faamatalaga: https://www.9news.com.au/national/flu-australia-winter-influenza-season-lasted-longer-this-year–heres-why/ccb7ea23-765c-4756-91c8-cc926014db8e
