O le taeao analeila na to’ai taunuu mai ai i tua maota o le Malo i Eleele Fou le feau taumolimoli sa faasolo i le atunuu atoa e ala lea i le Sulu o le Filemu e pei ona taimua ai le Faalapotopoto a le Toomaga mo ē Puapuagatia.
O le sauniga e taualuga ai na faailo ai e le Minisita o le Matagaluega o Tina ma Tamaitai Atinae o Afioaga ma Aga Fesootai Afioga Mulipola Anarosa Ale-Molioo le lagolagoina o lenei faamoemoe e le Malo.
“E lē itiiti le silasila a le tatou Malo i galuega o loo gapatia ai a tatou faalapotopotoga tuma’oti e ala i faatinoga ma polokalame eseese mo le manuia lautele o tagatanuu.
“O le Faalapotopotoga a le Toomaga e lē tau faailo lo latou sao mo le soifua manuia ma le saogalemu o tagata faapea ai i latou o tulaga maaleale e aofia ai tina ma fanau aemaise i latou e iai aafiaga tumau o le soifua.
“O faamaumauga o ituaiga eseese o sauaga i le lotoifale aemaise le ogaoga ma le lautele o aafiaga o lenei faafitauli o loo mafai ona manino ai le fuainumera mai faamatalaga ma faamaumauga.”
O loo faatinoina e le tele o Malo o le lalolagi polokalame ma faatinoga e tafiesea ai lenei faafitauli ae peitai na saunoa Mulipola e ui i le tele o nei taumafaiga e lē o mafai lava ona taofia sauaga.
“O le mafuaaga lea e lē o muta ai le feau taulogologo e taumafai ma faatino pea galuega e foia ai ma tali atu ai i aafiaga o lenei faafitauli.”
O le polokalame o le Sulu o le Filemu o se faataimuaga tele lea i le agai atu ai i le faamanatuina o le 16 aso o faatinoga e tetee atu ai i sauaga o tina ma tamaitai lea e amata atu i le aso 25 o le masina nei seia paia le aso 10 o Tesema.
