Ua mae’a folasia i le faamasinoga sili a le atunuu finauga faaletulafono a le Loia Sili o loo tauaveina le itu a le Malo, ma loia mai Niu Sila o loo finauina le talosaga a Tu’isila Maluafiti Fagasoia Tu’isila, lea o loo finau o eleele uma o le motu o Namu’a i Aleipata o fanua faaleaganuu e faasino i le suafa Tu’isila o Mutiatele i Aleipata.
Peitai o loo iai le finauga a le Loia Sili o le motu atoa o se meatotino a le Malo.
Sa iai se talosaga mai le Loia Sili e taofia le suesueina o le mataupu ona ua taoto faamaumauga e faasino i le pule o le motu ma ona eleele uma.
Peitai o Me o le tausaga nei na aumai ai le faaiuga o lea talosaga na teena, ma faatulaga ai le talosaga a le itu tagi ina ia suesueina e pei ona sa faagasolo ai folasaga a loia a itu auai o le mataupu mo le lua aso.
O lea ua tālia se faaiuga a le faamasinoga ma e lē o iloa se aso e fofogaina ai.
