O lea ua mae’a tuuina atu finauga a loia mai fafo sa malaga mai e faia finauga faaletulafono, i le matāupu sa tuuina atu i le Faamasinoga Maualuga e le ta’ita’i ma le sui ta’ita’i o le vaega faaupufai e puipuia aiātatau a tagata o loo agaia le malo, o loo finau ai e solitulafono ma soli faavae le faia o le palota a le Fofoga Fetalai i taualumaga a le fono aoao ia Fepuari lea na maua ai le lua vae tolu o le aofaiga o nofoa e 53 o le Palemene na pasia ai teuteuga o le faavae o le tausaga 2025.
O le taimi muamua lea i le talafaasolopito o paeaiga faapalemene a Samoa talu ona tuto’atasi, ua palota ai le Fofoga Fetalai mo le sa’ilia o le lua vae tolu e iloa ai le pasia ma le teena o ni teuteuga o le Tulafono Faavae.
Na ausia le lua vaetolu i le 36 na lagolagoina teuteuga ae to’a sefuluono na palota tetee.
O le Fofoga Fetalai susuga Papalii Li’o Oloipola Ta’eu Masipa’u ma le Loia Sili a le Malo o loo molia e le ta’ita’i o le Itu Agai, susuga Tuilaepa L Sailele Malielegaoi, ma le sui ta’ita’i le tofa Lauofo Fonotoe Pierre Lauofo Meredith.
O le Aso Lulu o le vaiaso nei na faagasolo ai lea faamasinoga ma ua mae’a folasaga a loia ma ua faatali nei se faai’uga a le afioga i le Faamasino Sili, ma e lē o iloa se aso e fofogaina ai.
