Ua faailoa manino e le ta’ita’i o Lusia, Vladimir Putin o le a leai lava nisi toe fetuuna’iga e faia i mea o loo mana’o iai lona atunuu aemaise lava i le matāupu e faatatau i le tuuina ane e Ukraine o ona teritori ia Lusia.
O le lauga lea sa faia a Putin a o feagai ai pea ta’ita’i o le Atu Europa ma Amerika i se taumafaiga e faamautū ai se filemu mo Ukraine.
Ua faailoa e Putin i ta’ita’i o Europa o loo lagolago ia Ukraine, o le a ave faamalosi e Lusia teritori ia pe afai lava e oo i lea tulaga.
Fai mai Putin e sili atu ia i latou le faatino o le tulaga lea ma aveese ai le māfua’aga tonu na māfua ai lenei vevesi.
Ua ta’ua i lipoti o loo faaauau pea foi ona tumau le finau a le ta’ita’i o Ukraine o Zelensky e lē faamatuuina atu ona teritori.
O finagalo faaalia o tagata i luga o upega tafa’ilagi i le matāupu lea ua ta’ua ai ua fai si umi o lenei finauga ma ua tatau lava foi ia Zelensky ona silasila i se isi itu e maua ai le filemu o lona atunuu auā o loo faaauau pea osofa’iga a Lusia ma o loo maliliu pea lava tagata o le atunuu.
Puna o Faamatalaga: https://edition.cnn.com/2025/12/17/europe/putin-no-willingness-to-compromise-ukraine-intl
