Ua toe amata le polokalame a le matagaluega o le soifua maloloina ua ta’ua o le health of the nation i le tuanai o ni tausaga e le o toe faia.
O le polokalame muamua ua ave ai le lu’i a le Minisita o le matagaluega i foma’i o loo galulue i le pulega e aofia ai le Ofisa Sili, e toe faaaogā o latou tomai faafoma’i e vaai ai gasegase e usu seu i le taeao i le taimi e lei usu atu ai foma’i i le vaega e taunuu iai gasegase poo le outpatient.
O se tasi lea o manaoga na faaalia e le Minisita o le soifua maloloina i le polokalame, sa savalia ai lona ofisa ma talosagaina se foma’i e galulue i le 6 i le taeao ona e ta ane le fitu faasolo i le 8 ua tumutumu atu le atunuu ma o le isi lea o mafuaaga o le tuai ona maua o avanoa e vaai ai se foma’i.
O le iva i le taeao e faatoa amata ai foma’i tiute seia vagana le taimi lea na faaalia e le Faatonu Sili o le soifua maloloina i le polokalame, e na o le foma’i e tiute mo gasegase tigaina ma faalavelave faafuasei e na te lē vaaia ni gasegase tausavali.
Ni finagalo o le Minisita o le soifua maloloina le afioga Valasi Luapitofanua Toogamaga Tafito Selesele ma le Faatonu Sili aoao o le soifua maloloina le susuga Aiono Dr Alec Ekeroma i le polokalame a le matagaluega ua toe faaauau.
O le polokalame foi lea ua faailoa ai e le Faatonu Sili e toalua ni foma’i o loo galulue tutoatasi ua la talia le talosaga a le matagaluega e galulue mo ni itula o le vaiaso mo le faia o fā’ata o le ultrasound, o se auaunaga ua ave e le matagaluega i auaunaga tuma’oti e tolu o loo faia lea fā’ata, ona o le to’agaogao o le aufaigaluega.
Ua silasila nei foi le faatonu sili ma le pulega e faatino ni aoaoga mo le aufaigaluega o loo iai le tomai e faatino ai lea auaunaga faapitoa o loo manaomia e le atunuu.
