E lua ni tino maliliu na aveeseina mai mai lologa ile itu i sisifo o Sini, o se alii ma se tamaitai na maua i Coopers Creek i Wentworthville ile taeao analeila. Ua faailoa mai I lipoti na iloa ele alii pueata a le 7News leisi tinomaliu ao pueina ata o lipoti o lologa mai lea faaitu ma valaau ai loa le fesoasoani faavavave.
Lipotia pe a ma le 2 itula na galulue ai leoleo ma le au galulue laveai e aveesea mai tino maliliu o I laua ia ma o loo iai pea leoleo I lea nofoaga ile taimi nei. E le o faamaonia mai poo ai tonu nai ia tagata ua aafia ae o loo faaauau pea foi le sailiga mo se tina ma sana tama tam aba naua atu le la taavale i le faaitu lava lea o poloka i lologa, na lipotia mai o loo tau sailia talu mai le aoauli ananafi.
Ua matuai tele auala o loo tapunia ile taimi nei i Sini ona o lologa o loo aafia ai pea le setete o Niu Sau Uelese ile vaiaso nei. Ua fautuaina le atunuu ina ia nonofo I fale ma ia taofia le feoai ona o le tulaga lamatia o le soifua ua iai nei I le tele o magaala mai lologa.
O leisi lapataiga o loo agai I laau e toulu faapea uaea eletise e aafia ona o le malosi foi o le matagi I nisi pito o Sini atoa ai ma sologa eleele ua vaaia i isi faaitu. O le molimau a talafou e uiga ese le tala o le tau ua matauina I lenei tausaga ile faaauau pea o timuga mamafa ua aafia ai setete o Ausetalia.
Ua faitau afe tagata ua agai ese ma o latou fale I Sini ona o lologa mai vaitafe lalata ane aemaise lava mai vaitafe o le Nepean ma le Hawkesbury. O totonu o le aai o Sini ua foliga o se vaitafe se tasi o pitonuu mae faapea le vaaiga ua iai le tele o faaitu o le aai.
