I le 46 ai lenei o tausaga talu ona lē toe tasi le pulega o le Ekalesia Faapotopotoga Kerisiano Samoa e pei ona sa iai i tausaga ua tuana’i, ina ua tuto’atasi le ekalesia i Amerika Samoa talu mai le tausaga e 1980, ae e lē o motusia ai sootaga o le aufaigaluega faife’au ma ē o faauluulu iai le EFKAS i Amerika Samoa ma le EFKS i Samoa.
O le Aso Gafua na mae’a ai le mafutaga e tolu aso a faafeagaiga o ao sinasina o le ekalesia o loo umia tofi o faifeau toeaina sa usuia i Malua le laumua o le Ekalesia Faapotopotoga Kerisiano Samoa.
O se mafutaga e ta’i lua tausaga ma tauaofia e fetufaa’i ai i le galuega faafaife’au aemaise o le ola faaleagaga o tagata lotu.
I le talimalo ai o le fono a le autoeaina o le ekalesia i Samoa i le mafutaga sa molimauina i auala o faasalalauga a le EFKS le to’atele o le aufaigaluega faife’au toeaina ma o latou faletua sa malaga mai Amerika Samoa ma i latou o galulue i isi atunuu o loo iai le EFKAS, ma e faapena foi i le EFKS i Samoa.
O le faasoa o le alofa masani i le tatou agaga talimalo e ala i meaalofa na taualuga iai polokalame o le mafutaga lea sa oo lava ina tatala ai ie o le malo auā faaaloaloga masani, aemaise o tupe ma isi oloa sa faatino ai le fetufaa’i o le alofa i le mafutaga a faifeau toeaina o galulue pea a o nisi ua mālōlō penisione e lē gata i motu i Sasa’e ae faapea foi i motu i Sisifo o le atu Samoa o loo olaola ai le galuega a le ekalesia faapotopotoga kerisiano.
O le Aso Lulu o le vaiaso nei ua faamoemoe e toe taliu ai aumalaga mai Amerika Samoa ma toe foi ai foi faafeagaiga ma faletua sa malaga mai atunuu o loo faamautū ma galulue ai i le tausiga o le lafu mamoe.
