Ua folasia nei i le Palemene le Tala Faatatau Autu o Tupe a le Malo mo le isi 12 masina o lumanai e amata i le masina o Iulai o le tausaga nei ae mae’a i le faaiuga o Iuni o le tausaga fou 2025.

O lea fuafuaga o tupe ua aofia ai ni vaegatupe e sili i le ta’i 8 miliona mo matagaluega fou e lua a le Malo, le Matagaluega o Taaloga ma Alaga’oa mo le Fiafiaga o Tagata, ma le Matagaluega o Eleele ma Fua Fanua.

O le Matagaluega o Taaloga ma Alaga’oa mo le Fiafiaga o Tagata ua ave iai taaloga lea sa i le vaaiga a le matagaluega o aoga, faapea le pulega o malaetaalo uma i le atunuu.

O le Matagaluega o Eleele ma Fua Fanua, o le a ave uma iai eleele o le Esetete Tausi, o le Faalapotopotoga o Eleele a Samoa, ma le vaega o le lesitalaina o fanua lea o loo i le Matagaluega o Puna’oa Faalenatura ma Siosiomaga.

O le taimi nei ua i le vaaiga a lea matagaluega vaega uma tau eleele a le Malo e faatali ai le amatalia o le matagaluega fou o eleele ma fua fanua.

O tausaga ua mavae sa iai le matagaluega o eleele ma fuagafanua poo le department of lands and survey.