E lua ni malaga a vaalele tetele o le a taunuu i Samoa pe a toe tatala tuaoi faavaomalo o le atunuu i le Aso Gafua asau le aso muamua o le masina fou o Aokuso.
O ia malaga a le Air New Zealand ma le Fiji Airways e tutumu uma ma o le a faato’ā tatala ai lea o feoa’iga masani e lē gata o tagata o le tatou atunuu o aumau ma faamautu i fafo, ae faapea foi i tagata tafafao poo tulisi o le a afea le atunuu i mālōlōga ma tafaoga masani i le tuanai o le 3 tausaga o taofia malaga masani ma loka tuaoi faavaomalo o Samoa ona o le faama’i.
O le ogatotonu o lenei vaiaso ua amata ai ona toe tatala faasolo atoa auaunaga masani i Samoa e aunoa ma ni aiaiga faaletulafono i puipuiga o le atunuu i taimi faalavelave faafuasei talu ona amata faatino lea aiaiga faaletulafono faavae i le tausaga e 2020, ina ua amata pipisi le Koviti-19 i le lalolagi.
Ua faailoa e le ta’ita’i o le Malo o le faamuta o le iai o Samoa i taimi o faalavelave faafuasei le state of emergency, ma tatala tuaoi faavaomalo i le masina fou, o le a faatumau ai pea aiaiga o puipuiga faalesoifua mālōlōina mo pasese e malaga mai i Samoa, e pei o le mautinoa ia mae’a tuipuipui ma tui faaopoopo, ma tauave pepa o su’esu’ega faafoma’i e pasese malaga ina ia mautinoa ua tausisia puipuiga o le faama’i.
