I le lima itula na tatala ai nofoaga e fai ai tui puipui o le Koviti19 ina ua toe tatala faleoloa ma isi auaunaga moomia mai le 8 i le taeao e oo atu i le 2 i le aoauli o le Aso Tofi na molimauina ai le tumutumu o le nofoaga i le maota gasegase i Motootua i le toatele na lolofi atu e fia maua se avanoa e faia ai o latou tui lona lua pe o le faatoa faia foi lea o lona tui puipui.
E tusa ai ma faamaumauga a le Matagaluega o le Soifua Maloloina e to’a 12,000 ua maea le tui muamua ma ua maea aso e tatau ona faia ai a latou tui lona lua.
Peitai o le oo mai o le faama’i i le atunuu ma faamaonia se aofaiga o tagata e to’a 27 ua aafia, o lea ua vaaia le nanati atu o nisi e le’i maea tui puipui pe e le’i faia lava se tui mo le fia maua o lea auaunaga.
O le toe tatala ai o nofoaga mo tui puipui o le Koviti19 i le Aso Tofi na faaalia ai e nisi sa lē maua so latou avanoa ona o le faaaliga ane ua uma le vailaau.
