Ua alia’e i lipoti a le Newshub i le asō se video o le taimi na loka ai e nisi o le atunuu se alii na masalomia lona agai atu e gaoi se fale avamalosi,liquor store i Aukilani. O le Melrose Liquor i Mt Roskill lea o loo vaaia i le video lea ma le faamatalaga a tagata mai le komiuniti lea ua le lavava e faalogo soo i lipoti o nei ituaiga faalavelave aemaise lava foi nai tagata faipisinisi.
O le faamatalaga a le pule o le faleoloa na matuai lagona lona fefe ma ole mataupu na tupu i le afiafi o le Aso Sa na tea nei ina ua agai ane le tagata lea ma se screwdriver ma faatonu le tuuina atu o tupe peitai na iu ina toe lavea ai lava ia ina ua loka ai i totonu o le faleoloa ua faigata ona sao mai i fafo.
Ua fiu e tau tolotolo mai i le faitotoa peitai ua vave le alu ifo i lalo o le faitotoa i faiga a le aufaigaluega ma loka ai loa i totonu.
Sa taumafai e tata’e le faamalama i le fagu e faaaogā mo taimi o mu, le fire extinguisher.
Na faamatala e le pule o le faleoloa, sa naunau lava le alii i le maua o le till o le faleoloa peitai e lei manuia ana taumafaiga, na pue e leoleo ae agai ane si aufaigaluega e faamamā le nofoaga mai le tele o mea sa faaleagaina ai.
O le mau a tagata e pei ona faatalanoa i lea lipoti, o le taimi nei ua tatau loa ona galulue faatasi le komiuniti ma le aufaipisinisini i le mataupu lenei ma e manaia foi le faiga lea, o le loka ai lava i totonu o le faleoloa na alu atu e osofai, pue lelei ma le video e faamatamata iai le toatele ma lona aiga i lana galuega o loo fiafia nei e fai.
I le aai lava ia o Aukilani e 156 mataupu e aofia ai le gaoi ua faamauina i le tausaga atoa e oo mai ia Mati 2022 ae maitauina o le matutua o le toatele o i latou o loo faatinoina soligatulafono ia e i le va o le 10 tausaga i le 17 tausaga.
