O se tamaititi e i lalo ifo ma le 10 tausaga le matua, o ia le isi ua aofia ai i le lisi o tagata maliliu i le Koviti-19 mai le piliota o le va o le aso 19 o Tesema ma le aso Kerisimasi.
E 32,010 isi tagata ua lipotia le aafia i le faamai i le piliota lava lea atoa ai ma le 78 o i latou ua maliliu e iai sootaga i le faamai, le 78 lea e aofia ai ma si tamaititi e pei ona ta’ua, e itiiti ifo i le 10 tausaga le matua.
E oo mai i le vaeluaga o le po o le Aso Sa na tea nei e 413 gasegase o le koviti o loo taofia pea i falemai, atoa ai ma le toa 15 i potu tigaina.
O le aso 4 o Ianuari o le tausaga fou e toe tuuina mai ai le isi lipoti lata mai o le koviti mai le soifua maloloina.
