O le aso 7 o Iuni e oo i le aso 9 o lenei lava masina, poo totonu o le 48 itula na faamauina ai le 128 gasegase fou mai le lautele o le atunuu na aafia i le faama’i Koviti-19.
O lea aofaiga lata mai e tusa o le lipoti a le soifua mālōlōina ua aofia ai tagata malaga mai fafo e to’alua. Ua oo atu ai nei le aofaiga tuufaatasi o tagata ua maua i le faama’i i lo tatou atunuu i le 14,315. E to’avalu gasegase o loo taofia i le nofoaga faapitoa i le falema’i tele i Motootua.
O lea siitaga i le numera o gasegase o le korona vairusi poo le Koviti-19 ua saga fautuaina ai pea le atunuu e tausisia puipuiga lautele faalesoifua mālōlōina. O loo faamauina i le lipoti lata mai lenei e to’avalu pasese na malaga mai Niu Sila i le aso 5 o Iuni na iloa ia latou su’ega poo test ua aafia i le faama’i.
E lē o faailoaina mai poo le ā le malaga mai fafo na maua ai le isi to’alua fou o pasese lea ua maua ai le aofaiga e 128 o gasegase fou o le Koviti-19.
