O se tasi lenei o Ekalesia ma o se sosaiete tele i le lalolagi o loo telē sona sao i le atunuu lea na faamanatu ai le lima tausaga talu ona faavae i le 2018.
O le Salvation Army o loo ua faamautu nei i lona nofoaga i Vaivase Tai ma o se tasi lenei o ona lala i le Pasefika e aofia ai Fiti ma Toga ma le isi ona lala i Niu Sila.
O le faamanatuina ai o tausaga talu ona faavae i Samoa o se avanoa lea e toe faailo ai le agalelei o lenei Ekalesia e le gata i ana polokalame faatino ae o fesoasoani o loo mafai ona faasoa atu i le atunuu.
E pei ona ta’ua e le sui o le Ekalesia, Tufuga Misipati Niusulu e le na o agaga o tagata o loo fafagaina e le Ekalesia ae o nisi o vaega o loo mafai ona tautua ai i le atunuu.
“E tele polokalame o loo tuuina ai le auaunaga a le Salvation Army i Samoa nei, ma o nisi o nei polokalame e aofia ai le vaega o aoaoga i le tagofia o le ava malosi ma fualaau faasāina lea matou te galulue faatasi ai ma le Matagaluega o Faamasinoga.
“O nisi o fesoasoani o asiasiga i le Goshen Trust poo le vaega lea e iai i latou o loo iai aafiaga i le mafaufau matou te asiasi iai i vaiaso uma ma tuuina mai foi nisi o tulaga o loo manaomia ai la matou lagolago.
“O fesoasoani foi o loo tuuina i aiga mo se faataitaiga afai ua oo mai i le masina lenei o loo utiuti le faasoa a se aiga ae ua oo foi i le taimi e faagata ai piliaoga o tamaiti poo ofuaoga foi, e mafai ona matou fesoasoani iai.
“O nisi o food parcels, e iai lava le uiga foi lea o tatou tagata Samoa e manaomia le fesoasoani ae musu ina ne’i te’i ua iloa ane e tagata o lea e manaomia se fesoasoani ae peitai o le agaga lava ia o le Salvation Army ia agalelei ma tuuina atu se fesoasoani ua matou maua.
“A oo mai la se tasi e manaomia se mea ona ou ave lea e faatalanoa, ma e gata ai foi iina i le potu na e faatalanoa ai le mataupu ma le mafuaaga o loo sau ai le tagata e sulu mai mo se fesoasoani.
“E ala ona matou iloa o food parcels la na omai ai ona ua sii atu i le taavale ae o se upu faapea e iloa uma e le matou vaega le ala o lau savali, leai e faaeteete lava le faatinoina o a matou auaunaga i faamatalaga.”
Na ta’ua e Tufuga o nisi o polokalame e aofia ai le lagolagosua i le ola aoaoina o alo ma fanau e ala i le faitautusi.
“O le Mitialo o le isi lea polokalame o loo matou faatino i le taimi nei, e faia i Aso Faraile uma lava e iai nisi o sui o le matou Ekalesia o loo tautua i le Iunivesite Aoao a Samoa ma nisi o faiaoga ua litaea mai i tofiga lea o loo latou faatinoina lenei vaega.
“E le mo na o fanau a le Ekalesia, ae o loo tatala le avanoa i soo se tamaititi e fia auai e fesoasoani foi i galuega a mātua ma faiaoga e aoaoina le faitautusi a le tamaititi.”
“O nisi na o vaega tāua o loo faatino ai le auaunaga a le Salvation Army, a malosi le ola faaleagaga e malosi foi le loto e fesoasoani ai i le itu faaletino.”
O le faamoemoe o le aso faamanatu a le Ekalesia na molimauina e nisi o ana paaga e pei o le Toomaga mo ē Puapuagatia, Nuanua o le Alofa, Faatāua le Ola ma nisi o ana paaga masani ma aiga lotu.
