O anapo lea na faailoa mai ai le faaiuga a le Palemia Chris Hipkins ae oo mai i le taeao analeila ua faamaonia mai e Stuart Nash e leai se palota laititi a lona itumalo e faia ona e le faamavae.
Na vave ona osofai mai le taitai o le National anapo Christopher Luxon ma fai mai, afai ua tuli ma le Kpeneta o le isi mea e tatau ona fai o le alu ese loa ma le Palemene.
O se itu e le faigofie ona o le toe alu ai foi o tupe a tagata totogi lafoga ma i le faatusatusaga a le taitai o le ACT David Seymour, o lona uiga o le isi foi $1 miliona o le a faaaluina ai a o lea e le o toe mamao fai le palota tele.
O le tala mautinoa mai ia Stuart Nash e tusa ma molimau i luga o le 1News e le faamavae, ma e leai se palota laititi mo le nofoa o Napier.
