Fai mai le alii taalo o le Sea Eagles o Josh Aloiai e na te le ofuina se jersey a le ‘au i le 2023 pe afai e toe agai foi le kalapu e faaauau le faailoaina o le ofu lea e lagolago ai le faalapotopotoga LGBTQ.
O Aloiai le isi tama taalo e atoa iai le toafitu o tama taaalo na o latou teena le ofuina o le jersey lea a le ‘au ona o o latou talitonuga tau tapuaiga.
I le lipoti a le One News i le asō ua ta’ua ai se finagalo o le pule o le kalapu lea a le Sea Eagles mai Manly o Scott Penn e faapea o le a vaai le kalapu i le faalauiloaina o se jersey nuanua poo se rainbow jersey i le tausaga fou.
Fai mai na maua atu ni taufaamata’u ia Aloiai ma nisi o latou tama taaalo sa tetee i le mataupu lea ae o le a le suia ai o latou talitonuga.
Fai mai Aloiai i le 9news o le tali puupuu o le leai, o le a le taalo i lea ituaiga jersey ma o le eseese o manatu e le o le eseese lea o le faaaloalo.
Fai mai le alii taalo i lea lava lipoti sa mananao foi latou e fai so latou jersey kerisiano, christian jersey i le taimi o le Eseta ae lei nofo lelei foi i isi.
