E ui i le alia’e o nisi o mataupu e aofia ai le laisene sese e tagata o taavale e aunoa ma se faatagana mai le tagata e ana sa’o le taavale, ae leai ni suiga ua faailoa mai e le NZ Transport o le a faia i le tulaga o iai le faatinoina o mea i lea auaunaga.
Ina ia suia se laisene o se taavale, e pau le mea e manaomia o le numera o le laisene avetaavale, numera o le laisene o le taavale ma le $9 tālā e totogi o le fee ma le lima minute e faatumu ai le form online poo luga o le initaneti.
E ui la o loo iai lipoti o ni mataupu ua laisene ai e tagata taavale a isi e aunoa ma se faatagana peitai e le o iai se suiga i le faagaioia o lea auaunaga i le taimi nei.
Mo se faataitaiga o aafiaga o ia ituaiga mataupu e fetaui lelei iai le mataupu i le tausaga na tea nei na faamalosia ai se faatoesega mai leoleo ina ua o latou pueina se tagata fai mai ua ia gaoia se taavale ae peitai o le taavale lava a le tagata lea ae ua sui e se tasi tagata le lesitala ma lipotia o le taavale ua gaoia.
Na iloa mulimuli ane e le tagata moni e ana le taavale o lana taavale ua mae’a ona suia le lesitala i le igoa o se isi tagata ma ua oka foi e le tagata lea se isi laisene fou mo le taavale.
Fai mai leoleo i le lipoti lea e le o fia faia sa latou faamatalaga ona o le suia o se lesitala o se taavale e le o se solitulafono ae sili ai le saili o nisi faamatalaga i le Waka Kotahi.
Fai mai le Waka Kotahi i le lipoti lava lea e manaomia ona suia le tulafono ina ia faatino ai ia suiga ma afai e fai lea tulaga o lona uiga o le a tutusa loa le faatauina o taavale ma le faatauga o fale ma e tele atu loa isi faiga e tatau ona fai iai.
