A o amata fuafuaga o le asō mo le toatele o le mamalu o le atunuu i le taeao analeila, e pei ona femalagaa’i ai i luga o nofoaafi (train) na faate’ia le toatele i se mataupu na tulai mai i le faigamalaga mai Britomart agai i Manukau.
I le faigamalaga mai Manukau i le sefuluvalu minute e te’a ai le fitu na savalia ai i luga o le nofoaafi sui o le aufaigaluega e faia asiasiga, e ala o le siakiina o HOP cards ma pepa faigamalaga poo tickets a tagata uma o loo malaga i Manukau, ina ua oo atu le siaki i se tasi o alii papalagi na i luga o le nofoaafi, ae lē taliaina e lea alii galuega faatino a le aufaigaluega.
Ua musuā ma faapea e iai lona aiātatau e lē faaalia ai lana HOP card ia i latou.
Sa taumafai atu se tasi o alii faigaluega, ae faataligatuli lava lenei alii, pe ā ma se 3 minute o fālō lava le mataupu.
Na i’u ina faailoa iai e le tagata faigaluega le aveese ai o ia mai luga o le nofoaafi, ae ‘ata le alii ma amata pu’e le ata o le tagata faigaluega.
E toatele tagata na faaalia atugaluga i le alii i lona lē usita’ia o aiaiga e pei ona usita’ia e le toetele, ma e toatele foi ua tauau ina lē to’a ma amata lafo faamatalaga ona o le tuai ona alu ese o le nofoaafi talu ai le alii papalagi ma le finauga o loo faia pea.
Ina ua iso lava le aufaigaluega e aveese lenei alii, na faailo ai loa ia te ia le logo ai o leoleo talu ai lona lē usitai i aiaiga o asiasiga i luga o nofoaafi.
E lei taunuu i Manukau le faigamalaga a le nofoaafi ae alu ese le alii ua tele ai le vevesi o le taeao. O Otahuhu na nofo ai lenei alii.
E ui i le tuai ona taunuu o le nofoaafi i Manukau ona o lea mataupu, ae o le tala fiafia i le toatele ona e lei oo i se tulaga ma’ale’ale e ono aafia ai se isi poo lea foi alii.
