O le togisala e $50 afe tālā mo le sui Faipule o le itumalo o Aana Alofi 1, ae $20 afe tālā le Ofisa Sili o le Fono Faavae a lea itumalo faapalota, ua lē usita’ia e i la’ua na faatūtū iai le faasalaga.
Ua tapena ai nei le itumalo e ave se tagi i le faamasinoga i tuua’iga o le lē tausisia e le Faipule ma le Ofisa Sili, o aiaiga sa malilie iai i le tuuina atu o le vaegatupe e limasefulu afe e teu faafaigaluega i le UTOS, le faalapotopotoga o mavaega tausi a le malo.
Ua faailoa mai e se matai o le itumalo o Aana Alofi 1, le tofa Sauvao Taueva Faafouina, o le fono a le itumalo i le Aso Gafua o lenei vaiaso na faia ai lea togisala ma le tuutuuga ia ta le 4 o le afiafi o le Aso Gafua ua oo atu le sala, peita’i na faaalia e Sauvao e ‘afa le 4 ae oo atu le avea’i ua lē faia le sala.
O le togisala na taunuu iai le finagalo o le itumalo e faatino ona lē tuuina atu lea i le faamasinoga o le mataupu.
O le limasefulu afe sa teu faafaigaluega i le UTOS sa iai le aiaiga e faato’ā tala i tua i le faai’uga o le tausaga nei, peita’i na ta’ua e Sauvao sa faailoa e le Faipule o le ta’ita’ifono o le komiti a le Fono Faavae a le itumalo ma le Ofisa Sili, ua tala le tupe e faatupe ai nisi galuega o poloketi ona ua tuai atu seleni o le tufatufaga.
O le talaina o lea vaegatupe ua faaalia e lea matai ua faia e aunoa ma le logoina o pitonuu e fā o le itumalo.
E le’i manuia sa’iliga i se finagalo o le sui Faipule le tofa Fesola’i Tusiupu Tuigamala, ae o le Aso Lua o lenei vaiaso o le a feiloa’i ai sui o le itumalo ma le Minisita o loo iai le vaaia o le poloketi o le miliona e faatatau i le mataupu.
O Aana Alofi Numera Tasi le isi itumalo faapalota o loo i le lisi o itumalo o le a sainia maliega mo vaegatupe muamua o le miliona lona tolu, ae peita’i ua faaalia e Sauvao ua iai le finagalo o le itumalo e sili ona taofi vaegatupe o le miliona lona tolu, ae sa’ili muamua se finagalo o le faamasinoga i le mataupu ua oia ai le lotoifale o le itumalo ona o le limasefulu afe sa teu faafaigaluega i le UTOS.
