Ua lē talia e le Faamasinoga o Faigapalota le talosaga na tuuina atu e ave ai i tua le tagi tau palota mai le itumalo palota o Falealili 1, ma ua faatulaga ai le Aso Gafua o le vaiaso a sau le aso 8 o Tesema e amata su’esu’e ai molimau a itu auai.
O le itu lea a le tofa Tuiloma Tusa Laneselota Lameko na faauluina le tagi o moliaga o faiga faaālatua e faatosina ai nisi o tagata palota faasaga i le sui faipule le afioga Toelupe Maoiautele Poumulinuku Onesemo.
O loo iai foi moliaga a le faipule o Falealili 1 le afioga i le Sui Palemia faasaga i le tofa Tuiloma Tusa Laneselota Lameko.
Ua taunuu le faamasinoga i le faai’uga e teena le talosaga e ave i tua le tagi, ina ua mae’a su’esu’e i le Aso Lulu o le vaiaso nei le finauga a le vaega faaupufai e puipuia aiā tatau a tagata sa tuua’ia ai le aafia o ni faiga faaālatua i le taumafaiga e ave i tua le tagi.
O ia tuua’iga sa faailoa ai i molimau tusitusia a faipule e to’atolu o lea patī e aofia ai le sui ta’ita’i, e selau afe tala se tupe na ave e le faipule o Falealili 1 i lo latou sui tauva ma le faamoenoe e faasolomuli ai i tua moliaga.
Ua faia ai le poloa’iga a le faamasinoga i molimau o lea tagi tau palota ua laumanu’ia lo latou lē oo atu i le su’esu’eina o moliaga i le tatau ona auai.
O le faatonuga e ala i le poloa’iga ona a iai le molimau e lē usita’ia, e mafai ona loka ma taofia ai e leoleo.
O le tagi tau palota mulimuli lea e māfua mai i tapenaga o le faigā filifiliga a le atunuu aoao i lana palota tele ia Aokuso o le tausaga nei.
