Ua lē talia e le faamasinoga sili a le atunuu le talosaga a Lema’i Faioso Sione ma Malele Atofu Paulo ina ia taofia le su’esu’eina o le moliaga o le taupulepule e tagatavale lē sa avea ma Palemia, susuga Tuilaepa L Sailele Malielegaoi o loo molia faatasi ai i laua.

O le lē talia o le la talosaga sa finauina e le tamaitai loia o Unasa Iuni Sapolu ma Tasha Schuster, ua faaauau ai ona su’esu’eina le mataupu i le valaau o molimau a leoleo faapea molimau tetee a Lema’i ma Malele peitai e lei faamautuina se aso e faatino ai lea vaega o taualumaga o le faamasinoga ona e toe valaau le moliaga mo le toe faatulagaina o se aso e faia ai lea su’esu’ega.

I le faai’uga a le afioga i le Faamasino Sili na fofogaina i le Aso Faraile na te’a nei, ua aumai ai le poloa’iga e lē mafai ona faasalalauina mafuaaga o le faai’uga ona o loo faaauau pea le poloa’iga na faia muamua i le taimi na su’esu’e ai le talosaga a i laua ua molia e taofi le faasalalauina o faamatalaga uma e faatatau i le moliaga seia vaganā ua mae’a ona su’esu’eina molimau.

Ua faaalia i le faai’uga a le Faamasino Sili le afioga Satiu Simativa Perese, talu ai e tatau ona maua e i laua ua molia se faamasinoga e lē noatia ai o la aiātatau faaletulafono e tali ai i le tuua’iga poo le fair trial, o le mafuaaga lea o le tapu ona faailoa o mafuaaga o le faai’uga i le la talosaga le stay of proceedings.