O se tasi o mataupu amata i le fonotaga a le Palemene i le taeao nei, o le faasilasilaga a le Fofoga Fetalai, e tali mai ai i le faaseā na faaoo atu e le faipule o le Itumalo o Gaga’emauga Nu. 3, afioga Faimalotoa Kika Stowers, faasaga i le sui faipule o Gagaifomauga Nu. 3, o le ta’ita’ifono o le vaegafaaupufai a le Faatuatua i le Atua Samoa ua Tasi, a o le Minisita foi o Faato’aga ma Faigafaiva, le afioga Laauli Leuatea Fosi Schmidt.
E lei auiliili maia e le Fofoga Fetalai le atoaga o le faaseā, peitai na saunoa le Fofoga Fetalai, ua mae’a ona silasila i le faaseā ma ua faia ai lana faai’uga, o le a lē moomia ona oo atu lenei mataupu i se su’esu’ega a se komiti su’esu’e faapalemene, ae o le a ia faia se tusi e lapata’ia ai le sui faipule e tusa ai o le mataupu na laga atu i le faaseā. Saunoa atili le Fofoga o le Maota, o le mutaaga ai foi lea o lena mataupu ma e lē moomia ona toe talanoaina atili.
