Ua maua i lipoti aupito lata mai o le mataupu a faiaoga ma le matagaluega o aoga, ua toe faaauau le faia o solo tetee ina ua teena e faiaoga le ofo sa tuuina ane.
Fai mai e aofia ai ma se peimeni fou e $4,500 o le lumpsum payment i le ofo aupito lata mai a le matagaluega o aoga ua tuuina i faiaoga i le mataupu o loo faia ai pea feutana’iga i le va o itu e lua ma sa taofia ai ma le faia o se isi solo tetee i le asō.
O le ofo lea sa faatalia e le asosi a faiaoga e pei ona taatia mai ai feutana’iga i le vaiaso talu ai ma ua faailoa e le RNZ, o se tasi vaega o le ofo na tuu ane o le siitaga lea pe $4,000 poo le ono pasene i le masina o Iuni.
O loo ta’ua o le a iai foi ma le isi tolu pasene faaopoopo o le siitaga o totogi i le tausaga fou ma o le a siitia ai foi ma le totogi amata o faiaoga i le $60,735 i le tausaga amata i le 2024.
Ua lipotia e le Stuff i se taimi e lei mamao atu, o le imeli sa tuu ane i sui o le Post Primary Teachers Association poo le PPTA ua ta’ua ai e lē lelei tele le ofo ua tuuina atu e ono toe taofia ai solo tetee ma o le aso a taeao o le a faatino solo tetee e ala i le lē faia o ni aoaoga mo vasega 12.
Fai mai le peresetene o le PPTA, Chris Abercrombie e lē māmā ia latou lenei mataupu ma o loo latou fia agai e faatino o latou tiute i le aoaoina o fanau ae ao ona faamautu le mataupu lea.
