E le o aofia ai le atunuu o Tonga ile maliega o loo faia I le Pasefika e faatatau I galuega faavaitaimi ma ua faailoa mai ise lipoti I le televise tasi I le aso ua le aofia ai Tonga ona o tulaga o faigamalaga agai atu I le atunuu faapea foi ma nisi o luitau I nofoaga e faanofoesea ai tagata I le koviti.
Ole masina o Novema o le tausaga talu ai na ioeina ai e le Business Central le faaiuga a le malo ina ia faataga mai seisi 2afe o tagata faigaluega faavaitaimi I totonu o Niu Sila amata atu ia Ianuari seia oo I le ogatotonu o Mati o le tausaga nei.
O Samoa, Vanuatu, Solomona ma Fiti lea ua faamaonia le auai ai pea I lenei polokalame peitai la mo Tonga ua le auai ona o tulaga ia ele ausia nisi o tuutuuga ma aiaiga manaomia mo le polokalame.
Ua faatulaga foi e atunuu ia ina ia faamautu e iai le avanoa e toe faafoi ai tagata faigaluega ia I o latou atuuu pe a maea konekarate. Saunoa le ofisa sili o le matagaluega o mataupu tau ile atunuu o Tonga oFotu Fisiahi e itiiti lava avanoa o nofoaga quarantine ma o le mafuaaga lea. Pe a male 4 afe tagata Tonga o loo poloka pea I NiuSila, Ausetalia ma isi vaega o le lalolagi mae sili atu ona ogaoga o latou tulaga o loo iai nai lo tagata faigaluega faavaitaimi.
Na ia taua foi pe a male 1400 pe sili atu foi tagata Tonga I NiuSila o loo galulue faavaitaimi ma afai foi e uma a latou konekarate e manaomia foi ona toefaafoi uma I latou ia ile atunuu.
Na ia faaaia foi o loo ise tulaga lelei lava aua o loo faaauau foi ona agai le tusa ma le 152 o tagata ile lua vaiaso I Ausetalia e faigaluega ai. Ose finagalo faaalia ole ofisa sili o le NZ Apples and Pears I Hastings Alan Pollard na ia taua ole faatalanoaga lea ile va o Tonga ma le malo o Niu Sila.
Ua faamaonia foi e se sooupu a le Immigration a Niu Sila lea tulaga ua le sainia ai e Tonga le maliega mo lenei tausaga. Ua faailoa foi o tagata faigaluega e toefia foi I le atunuu ua unaia e faatulaga malaga ise kamupani vaalele ma faafesootai le malo o tonga mo se fesoasoani.
Ole 600 o tagata faigaluega mai Samoa na malaga mai ile ogatotognu o Ianuari ua agai sao I nofoaga faanofoesea a le malo mo le 14 aso
