O se suesuega ua leva ona faatalitalia e faatatau i le Koviti-19 ua faailoa mai ua lafoai e le matagaluega o le soifua maloloina ona e le o toe manaomia, pei ona ta’ua i se pepa o faamatalaga.
Fai mai se faamatalaga i le televise tasi o Niu Sila ua pasi ma le tulaga o le emergency o le faamai ma o le a lē toe aoga ai foi la nisi o tali e tuuina ane i le suesuega ona ua na o le toe lua foi tulaga o loo faamalosia pea i puipuiga o le faamai.
O le faia lea o talifofoga i nofoaga o tausia ai soifua, healthcare facilities ma ia faanofoesea gasegase ua faamaonia le aafia mo le fitu aso.
O suesuega ia sa muai faalauiloa e lē sa avea ma faatonu o le soifua maloloina lautele i le 2022 peitai sa toe folafola e le sui faatonu o le soifua maloloina, Andrew Old ia Novema i le tausaga talu ai o le a toe tolopo mai ia Iulai o le tausaga nei e faataunuu ai.
Peitai la o lea ua folasia i le vaiaso nei ua le taunuu ma o se tulaga ua le fiafia ai foi nisi e pei o Dion ONeale ona fai mai a ia, o suesuega ia sa ono maua mai ai faamatalaga e fesoasoani i le faatulagana o suiga o aiaiga o le faanofoesea o loo iai i le taimi nei.
O le isi itu e faapopoleina ai poo le ā tonu se tulaga sauniuni o iai o Niu Sila mo se isi faamai faapea auā o lea ua le taunuu le suesuega sa tatau ona maua ane ai nisi faamatalaga i tulaga tau le puipuiga.
