O le taamilosaga ua faaigoaina o le Vodafone Netball Worlds Cup Qualifier poo le taamilosaga e saili ai avanoa mo le Ipu o le Lalolagi lea o loo faia nei i Fiti, e le’i manuia le ulua’i taaloga a le ‘au a le atunuu le Tifa Moana ina ua malolo i le ‘au a Tonga.
I lipoti a le Samoa Global News na faailoa ai le finau o le amataga o le taaloga ma e mae’a ifo le kuata muamua o loo sili ‘ai a le Tifa Moana 17 i le 14 a le ‘au a Tonga.
Peitai i le kuata lona lua na malosi le tali mai o le tulimanu mūmū ma tomua ai le ‘au a Tonga i ‘ai 32 i le 27 a Samoa.
Mae’a ifo le Kuata lona tolu ua mamao le sili o ‘ai a Tonga 50 i le 36 a Samoa, tula’i mai ‘ai mulimuli o le taaloga 69 Tonga i le 52 a Samoa e ui na finau atu le ‘au a le atunuu i le kuata mulimuli.
O lea la ua agai le Tifa Moana e toe tapena ma sauni mo isi ana taaloga o loo totoe e feiloa’i ai ma ‘au a le Atu Kuki, Fiti ma Papua Niu Kini.
E lima ‘au mai atunuu o le Pasefika o loo tauva nei i avanoa e lua e sao atu ai i le Ipu o le lalolagi i le taaloga netipolo lea o le a faia i Cape Town i Aferika i le tausaga fou.
