Ua lē fiafia i latou o loo finauina le tuu mai i le 16 tausaga le matua e mafai ai ona palota.
A o toe fetuunai ai le faamuamua a le malo e le gata o mea faaleleia ona o le afā ae faapea le taugata o le soifuaga, ae ua le fiafia ai nei ma i latou na momolia atu i le malo lenei talosaga.
O le faaiuga o le tausaga ua alu na fofola mai ai e le malo ana fuafuaga o le tuu mai i lalo o le tausaga e mafai ai ona agavaa e palota, peitai e moomia le ioe a le 75% o sui o le maota e pasia ai.
A o malamalama ai i latou o loo finauina pea lenei mataupu Make It 16 i le mafuaaga ua fai mai ai le malo o loo toe tau fetuunai mea e ave iai lana faamuamua, ua toe lagona ai le talosaga e tatau foi i le malo ona manatua o tupulaga 16 ma le 17 lea foi e ui i le taugata o le soifuaga, atoa ai ma le tele o fesuiaiga.
Ua fai mai ai ma Sanat Singh o le faatonusili o le Make It 16, e iai lona talitonuga o le faaiuga a le malo na faia i le Aso Gafua e ono mafua ona o le faigapalota tele o loo loma nei atoa ai ma faiga faapolokiki.
