O lea ua amata toe a’e nisi o aoga i Aukilani i lenei vaiaso, ma e le o faigofie i matua le tau o ofuaoga ma meaaoga.
Molimau a se tasi o puleaoga i Magele i tala a le Newshub, o le taimi o le fetuunai o mea totogi, poo le fanau poo pili ma peimeni.
O le toatele o matua ua toe molimau i le tele o ofuaoga ua faaopoopo le isi $5, $10 poo le oo lava foi i le $15 pe a faatusa i le tau sa iai i le tausaga talu ai.
Tuu mai i meaaoga o le tau o masini chromebooks lea o loo tele ina faamalosia mo aoga maualuluga, e le taugofie ma o loo matuai faigata tele i matua e toatolu agai i luga le aofai o fanau aoga.
Mai le Variety o se tasi o faalapotopotoga o loo fesoasoani i fanau o moomia le fesoasoani, o le lisi faatalitali sa iai ia Aokuso o le tausaga ua alu sa 700 ma ona tupu, peitai o lea ua faaluaina ma o fanau nei mai soo se itu o Niu Sila e moomia se isi e totogia a latou aoga.
E le na o le Variety le faaapotopotoga o loo fesoasoani i matua, o loo iai isi e mafai ona fesoasoani i seevae ma ofuaoga e pei ona tāua e le Variety ma a faigata ona maua, e mafai ona faafesili i aoga.
O le tele o aoga i totonu o le atunuu e faatoa a’e i le vaiaso fou.
