O le aulakapi a tamaitai a le Hurricanes Poua, o le a lē faatagaina le toe faia o le sivatau o le haka e pei ona vevesi ai, sa faatinoina i le Aso Toonai, e pei ona faaalia ai e le Ofisa Sili.
Ae lei faia le latou taaloga muamua o le taamilosaga a le Super Lakapi Aupiki ma le Chiefs Manawa, sa faaaogā ai e lea ‘au a tamaitai i Ueligitone se haka ua faia iai se suiga i ni faaupuga, e aofia ai upu o le “karetao o te Kawana kakiwhero”, faaliliuina i le faapapalagi, “puppets of this redneck government.”
I se faa-Samoa taulalata iai “o ni faatagata faatonutonu o lea faigamalo faailogatagata.”
O se haka, e faasino lea i le Toitu te Tiriti, se gaioiga faapolokiki e tulai faasagatau i aiaiga faatino a le faigamalo soofaatasi i le gagana Maori, ma le solia o le Feagaiga o le Waitangi, faapea ma le faalototeleina o tagata ia aua lava ne’i gaulua pe pio i le faalogo i le faigamalo.
Sa logo ai e le Ofisa Sili o le Hurricanes, Avan Lee, i le polokalame a le Morning Report a le Leitio a Niu Sila, o le a talanoa i teine taaalo i le Aso Tofi.
Ae sa ia faamanino i le pulega ma le pulega o le ‘au, e latou te lē lagolagoina upu sa faaaogāina i le haka.
Ma ia ta’ua ai, o tagata taaalo ua lē o ni tagata faigaluega a le Hurricanes, ae o le latou feagaiga taaofai o loo aofia ai le “leai o ni faamatalaga faapolokiki e faia, ma aua ne’i tuuina le taaloga i feteenaiga.”
E ui lava sa talia e Lee le haka e mafai ona faapolokiki, ae o upu sa faaaogāina ua fai lava si malolosi.
Ae o le teine taalo pou a le Hurricanes Poua ma le taitai o le haka, Leilani Perese sa ia folasia le haka fou i le pulega o le ‘au, i le minute mulimuli ae lei faia le taaloga e pei ona selau pasene ai le latou lagolago.
Sa ia ta’ua ai, e lē kea i se tulaga e iai se tali fuaitau e faaono iai i le haka, auā e mananao e fai ma sui o Maori, Samoa, Tonga ma isi tagatanuu toaitiiti i le latou ‘au.
E oo i le aufaipolokiki sa tuu foi o latou isu i lea vevesi, e pei o le Minisita o Taaloga Chris Bishop sa ia teena nei tuuaiga e faapea o le faigamalo e lē faailogatagata.
Na faaalia e le Palemia talu ai nei ma le taitai o le Labour, Chris Hipkins, e taatia atu lava i le vaega o taaloga e gafa ai ma se faafitauli faapea.
Sa tusia e le Minisita o le Va i Fafo, Vaovasamanaia Winston Peters e faapea, “ana faapea e tele atu le uai a le Hurricanes Poua i le pue ma le sapoina o le polo nai lo le faaalu lo latou malosi e faia ai le haka i se taumafaiga e osofaia le faigamalo, atonu e lē matuai sasapalaina i se faia’ina matagā.
