Search
Search
L-R: Pacific MPs Fa'anana Efeso Collins (Green Party) Angee Nicholas (National Party) and Lemauga Lydia Sosene (Labour Party).
L-R: Pacific MPs Fa'anana Efeso Collins (Green Party) Angee Nicholas (National Party) and Lemauga Lydia Sosene (Labour Party).

Ua lava tapena sui faipule Pasefika o le Palemene a Niu Sila

Ua tautino sui fou Pasefika o le Palemene a Niu Sila, ua sauni e avea i latou ma sui malolosi e finau mo le komiuniti aemaise lava mo manaoga o tagata Pasefika.

O Angee Nicholas o le faipule fou o le National, faapea Agnes Loheni o loo sao mai totonu o se faipule o le lisi a le National ma Faanana Efeso Collins o le faipule fou mai le lisi a le pati a le Green, o nisi nei o suafa fou i le maota.

Ua faatasi ai ma Lemauga Lydia Sosene lea na muai ulufale i le tausaga talu ai o ia o se faipule mai le lisi a le vaega faaupufai a le Labour seia oo mai ai ina faamanuiaina i le faigāpalota tele, ma tulai mai ai o le faipule filifilia mo le itumalo faapalota o Magele.

O Angee Nicholas, o se tamaitai mai le Atu Kuki na soifua ane i Rarotonga a o lei malaga mai lona aiga i Niu Sila.

O ia o le sui faipule filifilia o le itumalo faapalota o Te Atatu ina ua uma le faitauga muamua o le faigāpalota, peitai o loo faatali pea i le iuga aloaia a o faitau ai palota faapitoa, auā i le taimi nei, e na o le 30 palota o loo sili ai Nicholas mai le sui o le Labour sa tulai mai lea itumalo faapalota, le susuga Phil Twyford.

O le tamaitai Samoa o Agnes Loheni e le fou i le polokiki. Sa ulufale foi Loheni i le Palemene i le tausaga 2019-2000 peitai na toe malolo ina ua tauva i le nofoa o Magele, ina ua manumalo mai ai le Afioga Aupito Tofae Su’a William Sio.


New Pacific MPs –
Agnes Loheni

Ua na o Angee Nicholas ma Agnes Loheni o ni sui Pasefika i totonu o le vaega faaupufai a le National, ma o se tala fiafia lea, o loo iai nisi e momolia mataupu tau komiuniti a le Pasefika i totonu o le faigamalo ua tulai mai.

Mai le sui o le Greens, na saunoa Faanana e na te lē natia lona tagata Aukilani i Saute ma e lē fefe e faaleo ona manatu i totonu o faiga faapolokiki.

E lē o tāua tele ia Faanana le fuainumera o sui Pasefika, ae o le lagona ma amanaia le leo o tagata Pasefika, o le mea tāua lena faapea ni suiga e mafai ona faatino.

Ma le sui faipule fou filifilia, o ia foi o le uluai tamaitai ua tofia talu ona faavae mai le itumalo o Magele, Lemauga Lydia Sosene, o se fiafiaga tele ia te ia le lagolago a le komiuniti i lona tulai mai e ui o lea ua avea nei ma sui o le itu e agaia le malo.

O le talotaloga ina ia mafai ona toe iai nisi sui Pasefika e ono sao mai totonu i le faitauga faalua poo le faitauga aloaia o le faigāpalota lea o loo faagasolo, ae mo le taimi nei, ua na o le pau nei o sui fou Pasefika ua sao i totonu, e faaopoopo atu i nisi o faipule Pasefika sa iai i le paeaiga talu ai, ma ua toe faamanuiaina mai le faigāpalota o lenei tausaga.

O i latou nei e aofia ai le tamaitai sa avea ma Sui Palemia i le faigamalo ua tuanai atu, Carmel Sepuloni mai Kelston, o Barbara Edmonds o se tasi na avea ma minisita o le Kapeneta mai Mana Ueligitone, Jenny Salesa mai Panmure-Otahuhu, Tangi Utikeke mai Palmerston North, Teanau Tuiono mai le lisi a le Greens.

Tala sili ona faitaulia

SAMOA UPDATE

PODCASTS

Listen on

TALA FOU MAI SAMOA

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required