O le aso 14 o le masina fou o Mati ua fuafua e faasee ese ai lē sa avea ma Palemia o Niu Sila, Sir John Key mai ona tofiga i le fono faatonu a le faletupe o le ANZ ina ua filifilia Scott St John e avea ma taitaifono fou.

O le faamatalaga mai le faletupe ua ta’ua ai le tele o le sao o John Key i le ANZ aemaise i pisinisi faavaomalo ma le faapolokiki ma o le a misia foi lana taitaiga.

Na ta’ua e Sir John i le pepa o faamatalaga e mitamita ua iai sona sao i le atinaeina o le faletupe a le atunuu.

O Key le Palemia lona 38 a Niu Sila mai le 2008-2016 ma tofia ai loa e fai ma taitaifono o le ANZ i le 2018.