O le tatala ai i le vaiaso na sei mavae atu nei o le malaga mai i Niu Sila o tagata nuu Samoa o loo umia sitiseni faapea tulaga nofomau i nei atunuu lea ua faailoa e le taitaifono o Komiti o faalavelave faafuasei e to’a 90 na muamua malaga mai i Niu Sila i lea avanoa e aunoa ma le toe faanofoesea pe a taunuu mai i Aukilani
O le vaiaso nei o se aofaiga e 200 o le a tuua foi Samoa e aofia ai ma tagata faigaluega faavaitaimi lea foi e le toe faanofoesea ae agai sa’o i nofoaga o loo galulue ai.
Taua e le Faauluuluga o le Komiti o Faalavelave Faafuasei Agafili Shem Leo “O le malaga lea na alu i le Aso Toanai (vaiaso na tea nei) e 90 Ia i latou uma sa malaga ma na matou feiloai foi ma sui o le Hai Komesina o Niu Sila faapea ma Ausetalia ma talatalanoa i le lelei o le faatinoga o le process.
Mo le silafia e le atunuu o lenei process e telē le galuega a le Mālō o loo faatino aua e aumai le lisi ona talosaga mai lea o Niu Sila faamolemole matou te fia iloa poo fea sa iai tagata nei i le 14 aso.
E iai foi la aiaiga faalesoifua Maloloina a i latou nei mo le faatino lelei o le galuega.”
Taua foi e Agafili “O le vaiaso nei masalo pe oo atu i le 200 ma ona tupu tagata e malaga i latou lava o le QFT lea a Niu Sila e faapena foi la i le faasolosolo atu i isi malaga a toatele a la le vaega lena o tatou tama fanau na galulue faavaitaimi.”
O le manatu a le Faauluuluga o le Komiti faalavelave faafuasei o se vaaiga lelei lea i le sologa lelei o le malaga mai o tagata i Niu Sila o se auala e faailoa ai le talitonuina e Niu Sila o le faatinoga o galuega o loo faatino i Samoa.
