Fai mai le leitio faavaomalo a Niu Sila e lei tali ane Steven Joyce i le latou talosaga mo sana faamatalaga e faia faatatau i le mataupu ua lipotia i le upega tafailagi a le ofisa faasalalau i le vaiaso nei ua lipotia ai e toeititi miliona tala Niu Sila ua totogi e le Iunivesite o Waikato i lē sa avea muamua ma minisita o le Kapeneta a le National i tausaga ua tuanai.
O faamauauga ua iloa ai le tuuina ane le RNZ mai le va lea o le masina o Tesema 2019 ma Tesema 2022, e oo atu i le 966 afe tupe na totogi e le Iunivesite i le Joyce Advisory Ltd, o le pisinisi a Steven Joyce.
Ua faailoa ai ma se finagalo o le sui o le Tertiary Education Union i le Iunivesite o Waikato, o Shane Cugler e faapea ua matuai faate’ia i latou ma le lē fiafia i le aofai o le tupe o loo totogi e le Iunivesite ia Joyce ae o le tulaga o loo iai luitau tau tupe a le Iunivesite i le taimi nei ma toe fetuunai totogi o nisi o le aufaigaluega a o lea e foliga o loo maua pea na o le tupe e totogi ai lē sa avea ma minisita.
Sa teena foi e le iunivesite le faia o se faatalanoaga ma le ofisa faasalalau, ae i se faamatalaga mai le sui faaao o le iunivesite, Neil Quigley e faapea o le 2019 na faafaigaluega ai Joyce e taitaia se campaign fou e aga’i sa’o i tamaiti aoga, student recruitment.
Sa lipotia atu foi muamua e talafou se lipoti e faatatau i iunivesite i le atunuu ma luitau o feagai pea e oo mai i le taimi nei i le aofai o tamaiti aoga e lesitala i iunivesite aemaise o fesuiaiga ua faia i nisi iunivesite ina ia tau tuuititia ai tupe faaalu auā le faagaioia o iunivesite e pei ona masani ai.
