Ua aumai le lapataiga mai le matagaluega a le soifua maloloina i le atunuu atoa faatatau i le misela, i le mae’a faimalaga mai ai mai Ueligitone i Aukilani o se tasi ua faamaonia i le misela.
O lea case faamaonia na malaga mai ai i le faigamalaga a le Jetstar JQ258 i le Aso Lua i le vaiaso nei i le mae’a auai ai i se tasi o polokalame na faia i le kolisi a Scots i Ueligitone.
O le National Shakespeare Schools Production lea na auai ai le case faamaonia ma e faapea o lea na fesootai ma nisi o fanau aoga mai soo se vaega o le atunuu.
Ua valaau mai ai ia i latou uma sa i le kolisi a Scots mo lea faamoemoe e faanofoesea ma faafesootai le soifua maloloina.
O loo galulue nei le matagaluega e sailia uma nofoaga faapea tagata na fesootai ma le case faamaonia ma o se taimi o i luma o le a maua uma ai i luga o le upega tafailagi a le matagaluega nofoaga na asia e le case faamaonia.
Ae mo i latou na faimalaga faatasi mai ma le case faamaonia i le faigamalaga a le Jetstar ua ta’ua, o le asō e maua mai ai nisi faamatalaga faaopoopo mai le matagaluega.
