E toafitu tagata maliliu i luga o le auala i totonu o le 12 itula e oo mai i le taeao ananafi, ma o lea ua toe lapatai ma faamanatu mai ai ma leoleo.
E pei ona ta’ua i ripoti o ananafi e oo mai i le taimi o tala o le taeao e toaono i latou ua maliliu i luga o le alatele ona o faalavelave tau taavale, ma i nai itula mulimuli ane ae toe ta’ua mai le isi faalavelave i luga o le SH36 ma maliu ai le isi toatasi.
O le toatasi lea e faapea o le tagata tietie pasika, ma e ui na faatopetope atu i le falemai mo togafitiga e le i umi se taimi ae uma loa lona soifua.
Ua toafitu ai foi ia te ia tagata maliliu ona o faalavelave tautaavale i totonu o le 12 itula ma mai le ofisa leoleo e le mafai e leoleo ona taofia le faaopoopo pea o tagata maliliu i luga o le alatele, ma e moomia ai le galulue faatasi ma ia tautuana le saogalemu.
