Ua iai se lapataiga ina ia mataala i tulaga tau le puipuiga i se isi wave o le Koviti-19 e agai faatasi mai ma le fulū i le tau malulu.

Na ta’ua i le Newshub popolega o i latou e tele le tomai i tulaga tau le soifua maloloina ona o le a ono tutumu maota gasegase pe afai e tulai mai lea tulaga.

E silia ma le 14 afe tagata na lipotia le faamaonia o le maua i le koviti i le vaiaso talu ai ae o le popolega lea ona o le pepesi foi o le fulū i vaitau faapenei e masani ona maualuga ai foi le aofai o tagata aafia.

Fai mai o le aofai o tagata taofia i falemai sa faaluaina i vaiaso ua tuanai.

Fai mai sui o le soifua maloloina o isi wave poo pesiga o le koviti talu ai e oo atu i le fā i le lima masina le umi.

Ua ta’ua i le lipoti i le wave fou la lea o loo feta’ua’ina, ua faailoa i se suesuega sa faia e ono lamatia ai foi ma nai fanau i nofoaga e vaavaaia ai poo daycare.

O le fautuaga ma le faamanatu lautele, afai e le o lelei le faalogo, fai se talifofoga, faamamao ese ma nofoaga tumutumu ma faamamā lima poo aao ma faia laasaga uma e taofia ai le pepesi o le faamai.