O le tamaitai sui usufono a le Fono Faatonu o le Taulaga o Aukilani, ma o se uo mamae a Faanānā Efeso Collins ua ia tapaina tagata e aua ne’i seetia i fesootaiga o faasalalauga tuusa’o pepelo – fake livestream links – i luga o le upega faikakala a le Facebook, i le maliu o Faanānā.

O nei faasalalauga pepelo ua aliali ane a o tauaofia tagata mo le molimoli o faamaisega ma faailoa le agaga faavauvau mo le faipule a le Greens e 49 tausaga o lona soifua.

O Faanānā, sa palasi ma fano lona soifua a o auai atu i se sailiga seleni e faatupe ai vai mamā mo tamaiti i le Pasifika i Aukilani i le Aso Lulu o le vaiaso ua mavae.

O Josephine Bartley, sa ia logoina le polokalame a le First Up, sa talanoa i se faifeau o se ekalesia i Aukilani, ma ia ta’ua ai, na gau ana tupe i lea faiga taufaavalea.

Ma ua iai lona popolega, o isi tagata o le a seetia ai i lea taufaavalea.

Faaalia e Bartley, sa faaalu lona aso ananafi e tilotilo iai poo ai sa talia lea talosaga faauo i luga o le itulau a le Facebook, ma ia ta’ua ai, o nisi o tagata e tulaga maualuluga i faalapotopotoga a tagata lautele sa seetia ai foi.

Ma na ia ave ai lana avea’i ia i latou ma logo iai o se taufaavalea.

O lana lapataiga, e mulimuli mai i le lapataiga a le falemaliu a le Tipene Funerals, o loo tapenaina le falelauasiga o Faanānā, o loo lapataia ai nei itulau pepelo a le Facebook.

Ma faaalia ai e le falemaliu, e leai ma se latou sootaga ma nei itulau pepelo, toe leai foi so latou iloa o tagata o i tua o nei itulau taufaavalea.

Sa ta’ua ai e Miss Bartley, sa ia maua foi ia talosaga faauo i luga o le Facebook, e ofoina ai sootaga o le faasalalauina tuusa’o o le sauniga o Faanānā.

O le Aso Tofi o le vaiaso nei e faia ai le sauniga faalauaitele o le maliu o Faanānā i le nofoaga a le Due Drop Events Centre i Manukau, i Aukilani i Saute.