Ua lē mafai i le malosi o mau na faavae ai se faitioga a le sui faipule tamaitai o Gagaifomauga Numera Tasi le tofa Faimalotoa Kika Stowers Ah Kau, ona faamalieina aiaiga o tulafono tumau e avanoa ai ona tuuina atu i le Komiti o Tulaga Mamalu ma Aloa’ia mo se latou sailiiliga ni tuua’iga a lea sui usufono faasaga i le faipule o le itumalo o Gagaifomauga Numera 3 le afioga i le Minisita o le kapeneta susuga Laauli Leuatea Polataivao Fosi Schmidt.
Peitai ua ave le lapata’iga a le Fofoga Fetalai i le sui usufono na faatūtū iai le faitioga. Ua lē faailoaina e le Fofoga Fetalai susuga Papalii Li’o Oloipola Ta’eu Masipa’u i lana faai’uga na folasia i luma o le Palemene poo ā ia faitioga, ae sa ia faailoa mai ina ua maua iai se fesoota’iga i le telefoni e lē mafai ona faailoa ona o aiaiga o tulafono tumau.
O sailiiliga na faia sa iloa ai o lea faitioga sa agai lea i ni mataupu tau i le fono aoao faitulafono sa faailoa e le faipule o Gagaifomauga Numera 3 i le polokalame o le Soalepule i le faletelevise o le TV2 a le EFKS, ae o ia mataupu e le’i lotea ma talanoaina i tulaga aloa’ia i luma o le Palemene.
“O le Aso Lua, 31 Me 2022, na ou taulimaina ai le tali tusitusia a le sui mamalu o loo faasaga i ai le faitioaga, mo le iloiloga a le Fofoga Fetalai mo sana faai’uga i lenei lava mataupu. I le usita’ia o aiaiga o tulafono tumau 178 (2), na iloilo e le Fofoga Fetalai le tulaga o lenei mataupu mo sana faai’uga, pe ua fesiligia ai tulaga aloa’ia o le Palemene. O lea ou te lipoti atu ai lenei mataupu i le Fono aoao e faapea, ‘i le mae’a iloiloina o lene mataupu, ua taunuu atu ai i se faai’uga e faapea, e lē o se mataupu e taunuu atu i se taunuuga e faapea ua solia ai tulaga aloa’ia o le Palemene. O se mataupu foi e lē oo atu ona aafiaga i se laasaga e ono tagofia ai e le komiti o tulaga aloaia ma amio taualoa e tusa o aiaiga o tulafono tumau. Peitai, o le a tuuina atu i le sui mamalu se lapata’iga ma se fautuaga tusitusia a le Fofoga Fetalai e faamanino ma faatonufolau ai lenei mataupu mo le aga’i atu i le lumanai. Ma ua faamuta ai foi iinei lea mataupu.”
